Cronfa Eiddo Deallusol Cymru yn gwneud ei fuddsoddiad cyntaf mewn trac sain ar gyfer ffilm newydd Matthew Rhys

28/07/09

Mae Cronfa ED Creadigol Cymru wedi cymryd ei gyfran gyntaf mewn trac sain ffilm ar ôl buddsoddi yn ffilm hir ddiweddaraf Matthew Rhys, Patagonia, a dderbyniodd gyllid ychwanegol gan Asiantaeth Ffilm Cymru.

Cyfran ecwiti £120,000 y Gronfa ED yn y cynhyrchiad yw ei buddsoddiad cyntaf sy’n cynnwys hawliau i refeniw a gynhyrchir o drac sain cynhyrchiad.

Mae Patagonia, gyda Matthew Rhys a Nia Roberts yn y prif rannau, yn gynhyrchiad dwyieithog a leolwyd ym Mhatagonia ac yng Nghymru. Mae’r stori’n dilyn bywydau cyfochrog cwpl yn eu 30au a deithiodd i’r Wladfa i ailasesu eu perthynas a menyw oedrannus o’r Wladfa sy’n gwneud y daith yn y cyfeiriad arall, gyda chydymaith iau, i ogledd Cymru.

Cynhyrchwyd y ffilm, a ysgrifennwyd gan Laurence Coriat a Marc Evans, gan Rebekah Gilbertson a Flora Fernández-Marengo. Bu Rhys yn gweithio’n flaenorol gyda Gilbertson ar The Edge of Love.

Bu’r cynhyrchiad yn ffilmio ym Mhatagonia a lleoliadau ledled Cymru. Gwerir o leiaf £322,000 o’r costau cynhyrchu yng Nghymru.

“Mae Patagonia yn unigryw i’r Gronfa ED gan mai dyma’r cynhyrchiad cyntaf lle’r ydym wedi buddsoddi yn y trac sain cysylltiedig yn ogystal ag yn y ffilm ein hunan. Credwn y bydd y trac sain yn rhagorol ac unigryw,” meddai Bethan Bannister o’r Gronfa ED.

“Mae gan Patagonia hefyd - a ffilmiwyd ym moelni’r paith yn Chubut a bryniau glas yr Andes, heb sôn am leoliadau allweddol ar hyd a lled Cymru - holl nodweddion cynhyrchiad gweledol eithriadol o gyfoethog.”

Wedi’i reoli gan Cyllid Cymru ccc ar ran Llywodraeth Cynulliad Cymru, mae Cronfa ED Creadigol Cymru yn darparu buddsoddiad ecwiti ar gyfer ffilmiau hir, cynyrchiadau teledu, cyfryngau newydd a phrosiectau cerdd. Mae’n amod o fuddsoddiad y Gronfa y gwerir cyfran o gyfanswm cyllideb y cynhyrchiad yn uniongyrchol yng Nghymru. Mae’r buddsoddiad hefyd yn sicrhau fod y Gronfa ED yn manteisio o unrhyw enillion, a gaiff eu hailfuddsoddi mewn prosiectau creadigol yn y dyfodol yng Nghymru.

Mae Asiantaeth Ffilm Cymru wedi darparu £200,000 o gyllid tuag at y cynhyrchiad, sydd hefyd wedi derbyn cefnogaeth gan Gomisiwn Sgrin Cymru. Mae’r Comisiwn wedi rhoi cefnogaeth logistaidd a chydlynu, gan gynorthwyo i ddod o hyd i leoliadau, ymweliadau reci a chysylltu gyda pherchnogion lleoliadau.

Dywedodd Pauline Burt, Prif Weithredwr Asiantaeth Ffilm Cymru: “Roedd yr Asiantaeth Ffilm yn awyddus iawn i gefnogi’r prosiect hwn, gyda’r dalent allweddol ddeniadol, drwy ei gam datblygu ac ymlaen i gynhyrchu.

“Roedd cynhyrchydd deinamig a chryf a chyfarwyddwr profiadol, hyblyg a meistrolgar ym Marc Evans a ddaeth, gyda gweledigaeth tymor hir, yn bartner yn Patagonia Productions. Yn eu tro, maent wedi datblygu drama hudolus ac emosiynol a’u galluogodd i ddenu actorion dawnus gwych. Dylai’r stori emosiynol daro tant ar draws ffiniau ac apelio at gynulleidfaoedd ymhell ac agos.”

Yr arianwyr eraill sy’n cefnogi’r ffilm yw S4C, Pepper Post, Universal Music, JC Trust a Grenville Thomas. Yr asiant gwerthu yw The Little Film Company.

Wrth groesawu’r buddsoddiad a chyllid o sefydliadau yng Nghymru, dywedodd y cynhyrchydd Rebekah Gilbertson: “Gall cynhyrchydd ymdrechu am fisoedd i ddod o hyd i syniad a’i ddatblygu. Rydych yn dod o hyd i awdur a chyfarwyddwr, a chodi arian had ar gyfer datblygu sgript. Yna ewch ati i ddod o hyd i leoliadau a chast. Ar ôl hyn i gyd daw’r funud dyngedfennol pan roddwch gyflwyniad ar gyfer codi’r arian fel y medrir gwneud eich ffilm.

“Os ydych wedi gwneud eich gwaith, medrwch ddechrau dod ag arian go iawn i mewn, ond mae’n golygu llawer iawn o waith ac yn y diwedd ni fydd eich ymdrechion byth yn ddigon. Wedyn, yn union pan gredwch y gall fod yn rhaid i chi roi’r ffidil yn y to, mae buddsoddwyr fel Cronfa ED Creadigol Cymru a sefydliadau megis Asiantaeth Ffilm Cymru yn sylweddoli’r hyn rydych yn ceisio ei wneud ac yn rhoi’r help llaw sy’n gwneud yr holl wahaniaeth. Ni all Marc Evans, finnau, ein cast a’r holl dîm cynhyrchu ddiolch digon iddynt am wireddu ein breuddwyd.”

Ymholiadau gan y cyfryngau

E-bost: communications@financewales.co.uk

Ffôn: 029 2033 8126